Ministrja e Arsimit dhe Sportit, znj. Ogerta Manastirliu, inspektoi sot punimet në kantierin e gjimnazit “Kolë Idromeno” në Shkodër, ku po zhvillohet një ndërhyrje e thellë infrastrukturore që synon modernizimin e plotë të këtij institucioni arsimor sipas standardeve më bashkëkohore.

Shkolla po i nënshtrohet rikonstruksionit tërësor të ambienteve të brendshme dhe të jashtme, përfshirë laboratorët shkencorë, terrenet sportive, instalimet elektrike dhe hidraulike, sistemet e ngrohjes dhe ftohjes, mobilim të ri, si dhe infrastrukturën e aksesueshmërisë për nxënësit me aftësi ndryshe. Punimet po ecin me ritme të shpejta dhe pritet të përfundojnë përpara fillimit të vitit shkollor.

“Në Shkodër kantieret e arsimit janë duke ecur shumë mirë. Shkodra, në këto dy vite, është duke u mbështetur nga qeveria shqiptare përmes projekteve të investimeve në shkolla dhe terrene sportive. 7 milionë euro janë dedikuar vetëm për infrastrukturën shkollore. Ndërkohë që, ne jemi duke punuar t’i pajisim edhe me laboratorë të shkencave, laboratorë inteligjentë. Dhe shkolla “Kolë Idromeno” është gjithashtu pjesë e projektit të SmartLab-eve, sepse fillojmë fazën tjetër ku 654 SmartLab-e do të investohen nëpër shkolla; ku për herë të parë përfshihen edhe gjimnazet, që nxënësit të zhvillojnë potencialin e tyre në drejtim të aftësive digjitale.”, u shpreh Ministrja Manstirliu.

Gjimnazi “Kolë Idromeno” është vetëm një nga institucionet që po përfiton nga investimet në infrastrukturën arsimore në qarkun e Shkodrës. Të tjera projekte në vijim përfshijnë rikonstruksionin e shkollës 9-vjeçare “Ismail Qemali”, shkollat në Bushat, shkollën “Migjeni” në Pukë, kopshtin “Tom Alimhilli” në Shkodër, si dhe palestrat në shkollat “Dodë Kaçaj” në Bajzë, “28 Nëntori” dhe “Tring Smajli” në Shkodër.

Në rang kombëtar, 40 objekte të reja mësimore e sportive, përfshirë 22 shkolla të reja dhe 18 palestra e terrene sportive do t’i nënshtrohen procesit të rindërtimit dhe rikonstruksionit, duke ofruar kushte më të mira për mësim dhe aktivitete sportive.